Bastonate Pro-Loco #1: FERRARA

inauguriamo l’ennesima estemporanea rubrica di bastonate, che descrive la SCENA delle varie città (locali, gruppi che suonano, gente stronza all’interno dei posti, mafiosi che impediscono il quieto vivere eccetera) con la lingua e l’esperienza di un local. Primo episodio, l’amico e fiancheggiatore Marco Pecorari -il nostro uomo in Ferrara, essendo Accento Svedese un cittadino del mondo. 

_________________________________________________________

 

MB_cartello

Alòra, prima ad tacàr a dev dir un quel impurtant: mi son ad Cupar e brisa ad Frarà. Cupar, asiem a Cmach, Arzenta, Bunden e i pais più grand dla pruvincia (Zent l’è Bulogna e a nal cont gnianc) con Fràra al gà sempar avù al solit quel “spinta centrifuga-spinta centripeta”, cal quel lì insoma. A nò mai zirà a Frara e da Cupar a son andà a Bulogna e ades a stag in tun paes cl’è più vsin a Bulogna che a Frara (al paes l’è al Pog Renatic, iè mità blugnes e i ciama i caplaz ad zuca con n’altar nom).

Stal ragiunament als colega a quel cal m’ha dmandà Kekko, che tra l’altar l’è un rumagnol e zà al part svantagià. Ah, Frara l’è in Emilia ah. Sa eria de dir? Ah sì, che ala fin la miè l’è na lista fata da un cupares cal zira a Bulagna e l’è nat a Cupar e, sa vlen anc dirla tuta l’è sempar arià prima in ti quèi. Al miè l’è al paes d’ Alfio Finetti, al nostar Claudio Villa:

Ala fin pò a Frarà i quei i riva tardi o i vanza sempar quei. Al metal quel propria da aldamar e al metal-core i và ancora ala grand, quasi come in Polonia. Tut al rest o quasi l’è a macia ad leopard.

Al più famos frares ades l’è sicurament al miè amig Vasco Brondi cal sa fà ciamar Le Luci Della Centrale Elettrica: a sarev quasi inutil zcòrar ad Vasco ma la question l’è più cumplicada: ades uàlatar a pudì dir e pensar quel ca vliv (cal gà di testi da Smemoranda, cal fa sol chi tri quèi cola chitara e tuti sti quei chi) ma al ragazèt al sè fat la so bela gavetta e l’è un personag. Zà sol par al fat cal gà un bar (al ghea?) coi sò du fradiè chi’s ciama Rocco e Oscar l’è un quel da film. Al Bar as ciama Korova e l’è in via Sacca, pò ag turnem parchè l’è na via d’un zert pes in tl’economia dal nostar ragiunament. Insoma, al Bar ag truè i zuan e quei chi sona, purasà grup an nin tgnos gnianc un ma stal bar chi l’è un hot spot a pudresan dir. Ah, Vasco l’è sempar andà a tuti i AntiMTV days, da prima che tì tag fusi andà anc sol na volta par guadagnarat di punti scena. Ah, i stori cal raconta al li pol racuntar sol un barista ah. N’altar quel: la prima volta ca l’ho vist l’è stà al Renfe (na volta stal zircul Arci al fasea di bei quei e anca mi a gò fat sunàr dla zent, ades al fà schiv ingosa e rabia e a nag met un piè dentar gnianc si’m paga) cal suonava con gli Ardecore. L’era imbariag, pin come na mina. La miè ragazeta la’n ghera brisa e la m’ha dmandà: “cum eral al barista dal Korova?” E mi “imbariag”. Al sabato dòp al m’ha dà al sò demo, mì a lò ascultà un mes dop e al rest l’è storia.

Qualdun pò al pensa che Giorgio Canali al sia ad Frara: nò, l’è un rumagnol come Kekko, l’è nat in tal paes dal ducie e quindi lù a sal sèn bela strigà.

Pò a ghè Sara Ardizzoni che ades l’as fà ciamar Dagger Moth : la sà sunàr parech ben la chitara (la sunava in tna marea d’altar grup: Pazi Mine, Sorelle Kraus e an marcord più) e ades la spipula anch con l’eletronica. Mi an nag capis brisa tant però l’am pias e l’am pias anc parchè l’è na party girl clas la putreb tirar invenzi l’è n’toc ad pan,  gliè e al sò raghezet Edo Tagliavini c’lè un cl’è sta campion ad skate in tal nuanta e ades al fa al regista.

N’altar grup tecnic gen acsì iè i Penelope Sulla Luna pudresan dir chi i fà dal post rock senza cantar, iè anc un pò tamar (al tastieristà l’è un redneck mità canades e al gà al canadian mullet) e par quel is salva, i nas ciapa brisa acsì sul seri.

Pò a ghè i Silver Rocket che anc si gà un nom ciapà da na canzon di Sonic Youth che sa ta ni gnosi brisa ta nti cagaresti gnianc e po gnianc. Iè in trì e un l’è un venezian (a ghè purasà venezian chi i sa sposta a Fràra e i fa dla mulinaza) e specialment al baterista l’è intripà col revival neo-psyc di BJM e i Dead Skeletons. I fà garage un pò marz e un pò fighet parchè l’è marz e ala fin im pias abastanza par la media.

Se pò a vlen parlar ad Cmach, clè al paes più stran d’Italia (i zcor un dialèt cas pol capir sol sa tiè dal post, lì Pupi Avati al gà ambientà al sò capolaor La Casa Dalle Finestre Che Ridono, siv nat ieri dio maial?) a ghè i Modotti, tuti e tri ad Cmach (du iè zemiè). I Modotti i par un grup dla Dischord nat e carsù a Valle Bertuzzi du caghè sol anguil, zanzal, canapa e disagio a 1000. Iè sota l’ala protettiva dal zir Fooltribe/Upupa (Bob Corn, Three in A Gentlemen Suite) che ala fin iè mez fraris vist chi sta poc dop Bunden.

Pò a ghè un par ad grup chi part tuti dai Impact in un mod o in cl’altar. Sugli Impact nient da dir no? Praticament un di zinc grup punk-hc più impurtant d’Italia e forse anc d’Europa quindi. Sol chiè fraris e iè sempar stà trop a la man. A gò anch scrit un libar asiem, al pudì dmandar a Janz (al chitarista), zarchel in zir no? Ultimament a sè sintì zcorar ad lor parchè ia fat dla polemica sui fest dal PD e sul andar a sunar lì. La line up l’è quasi quela storica, con Diego e Gigo: ag manca sol al fradel ad Janz, Gigo. I sona ogni tant, par star asiem. Janz al gà n’altar grup anc, asiem a di altar un pò più zoan ad lù e i fà dal grind dla vecia scola chi tira zò tut: i sc’ama Death On/Off https://soundcloud.com/deathonoff e in zir a pudì truar i disc ch’ja fat. Ala fin i fa grindcore e i gà di titul quasi alla Anal Cunt e tuti chi quei lì ch’jè di classic dal zenar. Ig pista verament purasà, sav pias al zenar a vi r’cmand. Pudresan anc sol sol numinar gli Strike (al bas a ghè Diego), che in ti nuanta ierà purà gros pò ia pers al tren. Ogni tant i fà na reunion par quel di impurant, tipo sunar con Manu Chao o par al quel ad Federico Aldrovandi.

Pò a ghè tut un sotbosc garag scason dna ghenga un pò strana, anc par mi che ala fin a son un cal magna tut. I grup jè i For Food che n’à olta is ciamava Capitan Nemoa ghè dentar dla zent chi par di roadies di Butthole Surfers, dal white trash al zent par zent ma jè nat in tla pruincia. Pò a so ac ghè i The Ribs, i Not The Pilot. Iè tuti brav ma a fag fadiga a starg adrè. Si i fus nad in tun post men sfigà forse in sarev brisa acsì, l’è al sol bel. A pudresan dir chi jè na scena a part. Pò a ghè i Mirrorism, che ala fin i sta a Frarà ma iè mez venet e mez ad Mantua am mpar a mì. Sgonda mì forse un di mei grup, un pò new wave un pò punk psychedelic ma fat in tal 2014. Al lor 7 polas al là butà fora n’etichetta americana. Pò ala fin, ultimament am son de ciapar ben con la musica brisa fata con il chidar, la bateria e al bas, insomma alla musica elettronica. A Frara a ghè alora Marco Gallerani, mei tgnusù come Peedoo o Playground clè un deejay e un produtòr e al gà n’eticheta, la Hell Yeah clà butà fora di quei gros, i Crimea X du cag sona Jukka al chitarista dei Giardini Di Mirò con quel cal fasea al deejay al Maffia a Reggio, pò ià fat i Templehof, al Confusional Quartet…insoma, par chig pias al zenar di quei chin scherza brisa

 

Posti in du chi sòna o posti in doa a ghè dla mosa

En bela dit che al Renfe ades al fà schif, i ghea sunà i El Guapo par dir un nom. A ghè Zuni, propria in tal zentar storic che specialment alla dmenga al fà sempar di quei, pò a ghè dil mostar…oramai l’è una istituzion, in tal ben e in tal mal un punt feram par la musica. Ogni tant i ciapa dil mult parchè i vsin i s’lamenta dla baldunara. Pò a ghè l’Arci Bolognesi, che dop un pò ad temp chi i fasea sol reggae da un pò ad temp i s’è mis a far di bei quei sgonda mi, tipo al venar ca ghè l’experimental clu du chi gà sunà i Zeus!, Al Doum, Ovo…

Pò a ghè la Resistenza, clè na specie ad centro sociale (anzi l’è un centro sociale ma con la teseraAncescao)  ma senza la marzumara e cla tuleranza par qualsiasi aldamar cla fat sì che i zentar suciai “storici” (Dazdramir a Frara) ian des a faras dar in tal cul. Più in periferia a ghè al Patchanka, ogni tant i fà dla bela roba (ala fin l’è un bar con na sala du chi fa i concerti ogni tant). D’ Istà a Cupar a fag al Summer Days con i miè amigh dla squadra ad basket: conflitto di interessi. Sempar d’istà un skater ad Portmagior, Monta, con la sò BDC skaters al sà sbat par far un festival (al What is rock?) e di concerti e l’ha purtà i 7 seconds, gli Adolescent, i Lag Wagon…

 

Direv c’à sen apost, av salud. San son zmangà quel ag sarà pur un mudiv o anch du o tri.

7 Risposte a “Bastonate Pro-Loco #1: FERRARA”

  1. Capisco il fattore lol, ma visto che è interessante, non se ne può fare anche una versione in italiano, che così è illegibile?

  2. Pecora t’è sèmpar al più corrosiv ad tuti. Mì, che a stag’ d’là da Bundèn, a iò capì incossa. Anzi, at ringrazi par la citaziòn c’la n’era minga indispensabile, parchè ala fìn a semm sempar di mez mudnès e l’è anch’ mèza giusta che a i frarès ag femm schiv. In ogni mòd, al dialèt frarès al va benissim, però al nòstar nom l’è in inglès (parchè a v’lemm fàr i fighètt patnà) e ti t’là scazza e t’à fat un zapèl. An m’al s’teva minga da un acmè ti. Zio scanà, pàr gnanch che t’as atgnòss. S’avdemm in gìr e fa a mòd.

  3. Al sati al parchè? An fag brisa l’edit. A io scazà anc di altar quei (Gigo dgl Impact al ghè do volt)

Lascia un commento

Il tuo indirizzo email non sarà pubblicato.

Questo sito usa Akismet per ridurre lo spam. Scopri come i tuoi dati vengono elaborati.